10:18 PM
Luta ba loron aban, asaun tenke komesa husi ohin. Momentu hotu ne’ebe ita liu ona no oportunidade hotu ne’ebe agora iha no ne’ebe sei mai.
Hanesan restu moris nian ne’ebe ita moris. Luta ne’e mak ita bele moris to’o ohin loron, luta mak ita bele sente mundu nia ksolok, luta mak sei lori ita hodi ema seluk rekoñese ita nia luta, ho luta mak ita bele hadia no prepara ita nia aan ba mundu nia transformasaun ne’ebe ezije ita.
Ema ida-idak luta ba nia moris no futuru, husi dalan oi-oin ne’be sira sente dalan ne’e mak diak liu ba sira hodi hatutan sira nia luta.
Luta horseik ba ohin, luta ohin ba aban no luta aban ba loron tuir mai....! Luta ba moris, luta ba dignidade, luta ba historia, luta ba familia, luta ba kolegas, luta ba komunidade, luta ba Nasaun no luta hodi partisipa Mundu nia transformasaun no o nia sei rai hela hanesan memoria ida ba mundu ne’ebe sei la luta.
Luta hodi halo kontente ema hotu ne’ebe o hasoru iha o nia moris tomak, luta hodi ema hotu sente o nia prezensa ba sira ne’e importante, luta hodi fo ba ema buat ne’ebe ema presiza husi o, luta hodi fo ba o nia rai saida mak o nia rai presiza husi o...!!! Luta no luta nafatin hodi ema hotu hatene katak o moris no iha duni sira le’et.
Nu’udar joven, liafuan “LUTA” hanesan motivasaun ida ne’ebe presiza tau iha asaun no pratika iha viajen moris nian hodi hakat ba mehi ne’ebe iha ona kuandu ita hahu koñese mundu ne’e no sente mundu ne’e nia komplikasaun.
Hateke ba saida mak agora ita iha, no hanoin hikas fali ba saida mak liu tiha ona, no reflekta ba saida deit mak atu halo iha loron aban ba oin, realiza katak “luta seidauk remata”