Hetan Vizita Hosi Ekipa Casa Civil Palásiu Prezidensiál

 

Betano, 09 Fevereiru 2021 (IPB) - Institutu Politékniku Betano hetan vizita hosi ekipa Casa Civil Palásiu Prezidensiál hodi hala'o sorumutu kona-ba asuntu vizitasaun Prezidenti RDTL nian iha resintu IPB, loron tersa-feira, 09/02/2021.

Objetivu hosi vizitasaun ne'e, ekipa Casa Civil identifika Institutu ne'e hodi aprezenta ba Prezidenti RDTL ba sua exelensia nia vizitasaun ne'ebé sei akontese iha loron 23 to'o 25 fulan Fevereiru iha tinan ida ne'e. Iha loron 3 ne'e, sei loke expozisaun ou feira iha Institutu refere.

Bazeia ho enkontru ne'e, ekipa refere informa tan katak hosi vizitasaun Prezidenti RDTL sei iha programa ne'ebé propriedade hanesan dialogo no fahe informasaun no mós IPB rasik sei prepara no aprezenta kona-ba feira edukativu, produtu lokál nsst. Alende ne'e, iha parte seluk iha mós Prezidenti RDTL Nia espoza sei hala'o sosializasaun ba komunidade sira hanesan orfanato, Uma mahon liuliu ba feto Maluk sira no iha mós ekipa médiku espesiál sei halo tratamentu ba komunidade sira ho gratuita.

Magnífiku Prezidenti IPB Acácio Cardoso Amaral, PhD deklara katak Karik S.E Prezidente da RDTL deside atu vizita, Institutu, Ami sei haksolok tebes hodi simu sua exelensia Prezidenti RDTL nia prezensa. IPB mós sei selebra ninia Aniversário ba dahaat iha 23-02-2021, karik vizita S.E Prezidente iha loron ne'e, ami sei haksolok liutan.

Partisipa hosi Magnífiku Prezidenti Acácio Cardoso Amaral PhD, Vise Prezidenti I Cipriano Tilman MPA, Vise Prezidenti II Paulo da Silva M.Eng, Xefe Finansas Domingos Faria no Ekipa Casa Civil Palásiu Prezidensiál.

Mídia IPB